الموضوع ابتدى بأول يوم شفته في الجامعة ... كان مختلف ... جدا مختلف =) .. مختلف عن كل الوشوش اللي بشوفها كل يوم.
ماشي مفرود ... مستقبل الصبح بـروحه الجميلة .. ومبتسم =) .. دايما مبتسم ... عمري ماشفته من هنا لآخر الحكاية, إلا وهو مبتسم =) !!
مين ده .... وإزاي وصل هنا؟ وإزاي معداش على راسي , قبل مايوصل هنا ؟!! ... معرفش !! ..
طب إنت سامعني ؟ .. متأكد؟ .. طيب !!
طب إنت سامعني ؟ .. متأكد؟ .. طيب !!
.......................................
.......................................
.......................................
بعد تقريبا سنة من وقتها, كنا لسة مخلصين امتحانات ... يوم 25 يناير ... الساعة 7 الصبح , احنا وناس صحابنا, قررنا إن أول حاجة لازم تكون في اليوم تمشية ع البحر, من سيدي جابر لكامب شيزار (وأكيد يعني مش محتاجين نقول إن الفطار كان ألبان سويسرا).
وإحنا ماشيين ع البحر .. فرحانين ومبسوطين ... وبنجري تحت الشمس .. عدت علينا عربية "أمن مركزي" .... بصينالهم وقلنا :
- معادنا بعد الظهر ؟هـا ؟.....استنونا ومتتأخروش " !!!! .... وضحكنا ومشينا !!
ولما جه الليل ..... كانت الأخبار اللي ماتسرش ...
وبعده ... برده الأخبار مسرتش ...
أما ليلة الجمعة ...... فـالأخبار كلها اتقطعت ... مفيش أي طريقة عشان نعرف اللي بيحصل في الشارع !!
تاني يوم, كان الجمعة .. جمعة مختلفة عن أي جمعة .. صحيت مالنوم وانا نفسي مصحاش .. وأول حاجة كانت في بالي, طب انا دلوقتي عايزة أطمِّن عليه ... ياترى بات فين ليلة امبارح؟!! ..
الموضوع طلع بـجد, مش هزار زي مافكرنا من كام يوم !!
مسكت الموبيل ... مفيش شبكة
طب ابعتله على el-facebook؟ ... مفيش نت ...
طب رسالة؟ .............. مفيش أي طريقة عشان أوصله !!
قمت من السرير .. ولقيت نور الجمعة اللي عمره ماغاب, غايب عن البلد كلها....وقتها بس, ...... قررت أنزل الميدان !!!!!!!!!!!
منتج ورشة الحكي لشخص ما .... تقريبا الشخص ده , شكلها كده ... يمكن أنا !!
